男男性接觸者的感染個案一路偏高， 情況令人關注
自2004年開始，男男性接觸者感染愛滋病病毒個案一路不斷上升，情況令人關注。
喺2011年，衞生署進行嘅男男性接觸者愛滋病風險及流行情況調查結果顯示，每25 個同志中就有一個感染咗愛滋病。
而喺2013年，全年一共收到295宗男男性接觸者(同性/雙性)感染個案，佔總呈報個 案嘅一半以上(53%)，亦都係引致總呈報個案數目新高嘅主要原因。
「愛滋病」係咩嘢？ 愛滋病（後天免疫力缺乏症）係由愛滋病病毒（人類免疫力缺乏病毒）所引起。感染之後，病毒就會慢慢破壞身體裡面嘅 CD4 淋巴細胞（白血球嘅一種），跟住令到有呢個病嘅人嘅免疫力下降，產生各種「機會性感染」同埋腫瘤，最終導致死亡。
病毒點樣進入人體？ 病毒係由人體嘅血液、精液、陰道、前列腺、肛門嘅分泌物同埋母乳，透過以下途徑進入另一個人嘅身體，病毒就會傳染畀其他人。
香港超過七成有呢個病嘅人係經由性接觸傳染（包括陰道交、肛交同埋口交），病毒可以透過同性或者異性性接觸傳播，例如喺沒有保護措施之下同感染愛滋病病毒嘅人肛交、口交或者陰道性交。當中0仔嘅風險較1仔高。有幾個性伴侶嘅人亦會增加感染嘅風險。
就感染愛滋病病毒嘅人嚟講，即使佢嘅病毒載量跌到偵測唔到嘅水平，但係都仲可以透過唔安全嘅性行為傳播。如果同時感染咗性病、性器官潰瘍或者流血，傳播風險就更加高。
點都好，有性病或者性器官上面有潰瘍，係會增加感染愛滋病病毒嘅機會。
受感染愛滋病病毒嘅孕婦可以透過懷孕、生產過程或者餵人奶而將病毒傳俾嬰兒。
會有咩病徵同埋症狀？
大部分受感染嘅人望落去好健康，無任何病徵或者症狀出現，但係佢哋已經有能力將病毒傳俾其他人。 而有啲人就會好攰、發燒、無晒食慾、減磅、肚痾、夜間盜汗同埋淋巴結腫大嘅症狀。
愛滋病病毒測試
咩係愛滋病病毒抗體測試？
人體受到愛滋病病毒入侵嗰陣時，免疫系統就會慢慢產生抗體抵禦病毒。「愛滋病病毒抗體測試」可以驗得出血液裡面有無呢種抗體，從而確定有無受到感染。測試嘅結果呈陽性就係表示已經受感染；如果喺「空窗期」過後進行測試，結果呈陰性，即係表示無受到感染。
關於測試
「空窗期」期間，愛滋病病毒嘅傳染性好高。 空窗期係身體受愛滋病病毒感染開始，直至抗體測試能夠驗出陽性嘅一段時間，一般為三個月。已經受到愛滋病病毒感染嘅人，如果喺「空窗期」期間接受抗體測試，結果可能呈陰性，但係其實愛滋病病毒可以已經喺體內複製繁殖，增加傳染性，好容易就傳俾其他人。
如果曾經同感染愛滋病病毒嘅人發生唔安全嘅性行為， 雖然佢嘅愛滋病病毒載量可能低到驗唔到，但係你依然有受感染愛滋病嘅風險。 如果感染愛滋病病毒嘅人嘅病毒載量低到驗唔到，佢嘅傳播機會只係會低少少。而且，進行性行為嗰陣時射精仲會增加受感染嘅風險，而病毒又會儲喺其他體液裡面，例如前列腺分泌同埋肛門黏膜等等。
知道自己有無感染愛滋病病毒，對我有咩好處？ 而家嘅愛滋病治療已經非常進步，感染嘅人嘅生存機會已經大大提高，尤其如果喺感染早期就驗出嚟，治療效果就更加顯著。愛滋病治療更被證實可以有效防止愛滋病病毒經性接觸繼續傳播開去，呢個效果尤其顯著。
幾時同埋喺邊度進行愛滋病病毒抗體測試？ 從流行病學而言，有幾個組群已經被界定為感染愛滋病病毒嘅高危組群，包括男男性接觸者、注射毒品人士、女性性工作者同佢哋嘅顧客，同埋性伴侶已經係感染愛滋病病毒嘅人。建議通常每六個月到十二個月就應該做愛滋病病毒抗體測試。
香港提供愛滋病抗體測試服務嘅機構
你可以透過下載「1069試戴樂」App 得到免費安全套派發點同埋愛滋病測試點嘅資訊
AppStore (iphone版) AppStore (ipad 版) GooglePlay Store (Android 版)
抗病毒藥物嘅作用係直接壓抑或者減低愛滋病病毒嘅複製，從而加強或者保持病者嘅抵抗力，減慢病情。高效能抗病毒治療係混合使用呢啲抗愛滋病病毒藥物，亦都係現時香港常用嘅療法。 抗病毒藥物可能帶嚟毒性反應或者副作用，大多數嘅副作用係短暫同埋輕微，最常見嘅例如反胃、肚痾同埋腸胃不適。其他包括：貧血、降低白血球數量、肝功能受損、神經病變、胰臟炎同埋腎結石等等。
愛滋病病毒測試
AppStore (iphone版)
