常見性病

乜嚟架？

• 由梅毒螺旋菌引起。
• 傳染力極強，是男男性接觸者常見的性病。

點樣感染？

• 進行性接觸，如肛交做1仔或者0仔，同人或者畀人口交。
• 搞嘢嗰陣，如肛交、口交、舔肛同玩屁眼，直接摸到潰瘍處。

有乜徵狀？

• 第一期
  性器官上面或周圍出現唔痛嘅潰瘍叫「下疳」，亦可以在口腔、喉嚨或者肛門出現，而腹股溝嘅淋巴結可能會腫大。通常幾個禮拜就會自然痊癒，但其實感染已經進入第二期。
• 第二期
  會於感染後兩至六個月內出現各種病徵，例如發燒、疲倦、唔痕嘅皮疹同淋巴結腫大，皮疹可以係手掌腳板或者身體部位出現。病徵可以在無接受治療下消失，並進入隱性期。
• 隱性期
  在隱性期內可能無任何病徵，但仍有可能會傳染畀其他人。只可以透過血液測試確診。
• 晚期
  可能經過幾年甚至幾十年之後先出現病徵。例如心臟、眼睛、骨骼同中樞神經系統等器官可能被梅毒螺旋菌破壞，導致失明、身體殘疾、心血管疾病、神經系統同精神病，甚至死亡。

醫唔醫得好？

• 初期係較容易治癒，抗生素（如盤尼西林）可以醫好第一同第二期嘅梅毒
  另外治療後要做血液測試，確保真係康復。
• 治療隱性期/晚期嘅梅毒，可能需要較長的抗生素療程

乜嚟架？

由淋病雙球菌引起，感染範圍包括尿道、直腸、咽喉或眼睛。

點樣感染？

• 與感染者有性接觸例如口交、肛交、指交同拳交。
• 眼睛、喉嚨黏膜接觸到患者陰莖或者肛門嘅分泌物，也會被感染。

有乜徵狀？

• 有時無症狀，尤其係直腸或者喉嚨嘅感染更加察覺唔到。
• 可能會引起肛門周圍疼痛、痕癢。排便時或便後疼痛、有血液及黏液流出。
• 有時係感染二至十日後，有透明或者黃色尿道分泌物出現，仲會有刺痛同尿頻。

醫唔醫得好？

• 使用抗生素就可以治癒。

乜嚟架？

唔係由淋球菌引起嘅尿道炎。

點樣感染？

無用套嘅肛交同口交。

有乜徵狀？

• 症狀同淋病相似，但係無咁嚴重：例如:尿道分泌、尿頻、排尿及射精時有痛，通常於感染後二至三個星期出現。
• 有時可能完全無症狀。

醫唔醫得好？

• 服用抗生素就可以治癒。

乜嚟架？

係由人類乳頭狀瘤病毒所引起。

點樣感染？

• 透過口交、肛交、皮膚接觸而傳染。
• 就算無出現明顯嘅疣，已可以傳染畀他人。

有乜徵狀？

• 於感染病毒嘅二至三個月內，喺性器官外面或者肛門周圍生有椰菜花狀嘅小肉粒 ，而且會越來越大。
• 患處部位好脆弱，好易受創而導致感染同出血。
• 在肛門入面出現疣嘅人以0仔居多。

醫唔醫得好？

• 外用特效藥、電灼、冷凍或手術切除等療法。
• 不可根治，容易復發。
• 可考慮接種人類乳頭狀瘤疫苗(HPV)。

乜嚟架？

由疱疹二型病毒引起。

點樣感染？

• 透過皮膚接觸，例如直接接觸口部、陰莖或肛門上嘅傷口。
• 當爛口及水泡出現時，係最易傳染畀其他人。

有乜徵狀？

• 接觸病毒後，徵狀大約會喺二至五日內出現。
• 首先在受影響範圍有燒灼或刺痛嘅感覺，其後出現一撮小水泡，由針頭到豆般大都可以。
• 水泡通常喺三到、四日就自動穿破，變成有紅色邊緣嘅潰瘍。
• 如果無其他感染，患處通常在十日內痊癒。
• 部份患者可能有發燒、疲勞、關節痛同腹股溝上嘅淋巴結腫咗，而且持續兩、三個禮拜先至消失。

醫唔醫得好？

• 一旦感染，病毒會一直潛伏體內嘅神經線內。
• 當免疫力較低時就會復發，不過病情會較初發時輕。
• 唔能夠根治，但係嚴重程度同症狀可以因接受適當嘅治療而減到最低。
• 出現水泡嘅時候，較易感染其他疾病。記住要完全避免發生性行為。

乜嚟架？

由衣原體引起嘅尿道口、喉嚨或肛門感染。

點樣感染？

透過肛交包括做1仔或者0仔而引發尿道、肛門感染，或經由口交感染喉嚨。

有乜徵狀？

• 大多數男士係無病徵。
• 有時可能有水狀、白色或灰色尿道分泌、小便刺痛、尿頻、陰莖疼痛或痕嘅症狀。

醫唔醫得好？

• 服用抗生素就可以治癒。

乜嚟架？

由陰蝨俗稱三角蝨引起，經常匿藏在陰毛中產卵。

點樣感染？

• 多數係透過性接觸。
• 較少透過共用衣服、床單或毛巾而傳染。

有乜徵狀？

• 陰部非常痕癢。
• 可以睇得到有微細嘅褐色蝨子同/或者白色蝨卵。
• 受影響嘅部份仲可包括眼眉、眼睫毛、腋毛或胸毛。

醫唔醫得好？

• 特定外用藥物可以殺死陰蝨，而除卵梳可以去除蝨卵。
• 溫馨提示：唔好共用感染者用過嘅衣物、被褥同毛巾。

乜嚟架？

係由一種痘病毒引起嘅皮膚傳染病。

點樣感染？

• 透過同感染者皮膚之間嘅直接接觸，包括性接觸同受感染範圍嘅非性接觸。
• 搔抓患處可以將病毒傳播到其他範圍。

有乜徵狀？

• 患處出現類似蠟樣光澤的暗瘡，中央微凹如酒窩且痕癢，通常出現於生殖器範圍和身體其他部份。
• 如果因性行為而感染，通常都會喺腹部、陰部同大腿之間出現。

醫唔醫得好？

• 即使無任何治療，一般都可以喺六至十二個月內自行消退，但亦有一些因為無及時醫治而持續長達四年。
• 如果患處生喺性器官上面，就建議接受治療。
• 為咗防止病情惡化，可用衣物或者防水膠布覆蓋水泡或者腫塊，但要喺晚上除去。
• 冷凍、刮除或者激光治療患處，可以幫助舒緩病情。外用藥膏可以用來治療腫塊

演變

• 大部份患有急性肝炎嘅人都可以完全康復。
• 終身免疫，而唔會成為慢性帶病毒者。

症狀

• 大多數患者都無病徵。
• 可能有流感般嘅症狀：發燒、乏力、肌肉酸痛、頭痛、食慾不振、噁心同腹瀉等等。如果病情較差，黃疸（皮膚同眼白發黃）就會出現。

感染途徑

• 主要經由受污染嘅食水或者食物（特別係貝殼類例如蠔、蜆等）傳播。
• 性接觸傳播：好似舔肛，舔到少量糞便都可以感染。

預防方法

• 保持應做嘅個人同食物衛生。準備食物、食嘢前同去廁所之後用番梘洗淨雙手。
• 淨係飲已經煲滾嘅水或者樽裝水。食物必須徹底洗乾淨同埋煮熟，尤其蠔蜆等等雙殼類海產。
• 避免進行任何可能會接觸到他人糞便嘅行為、或接觸可能受糞便污染嘅物件。

疫苗

• 建議有風險行為（好似口交、肛交或者無固定性伴侶）嘅男男性接觸者接種疫苗。
• 一般嚟講，接種疫苗後要兩至四個禮拜後先會產生抗體發揮保護作用。

治療

• 如果有肝炎症狀，就要搵家庭醫生評估。
• 就算無醫過，免疫系統多數可以自行清除病毒。

演變

• 會引起急性肝炎同可以發展成慢性肝病，包括肝硬化同肝癌。
• 大約5%到10%有呢個病嘅大人係清除唔到病毒，成為慢性帶病毒者。

症狀

• 大多數患者都無病徵。
• 可能有流感般嘅症狀：發燒、乏力、肌肉酸痛、頭痛、食慾不振和噁心等 。如果病情較差，黃疸（皮膚同眼白發黃）就會出現。

感染途徑

• 大部份係經由母嬰傳播。
• 其次就係經由唔安全嘅性行為傳播，好似肛交同埋口交等等。
• 共用針筒或者注射器具。

預防方法

• 記住搞嘢一定要安全（戴套呀！）。
• 唔好共用假陽具等性玩具。如果玩具畀血液沾污，應該用1：4稀釋家用漂白水消毒。
• 千祈唔好共用針筒。每次都要用即棄嘅針頭同注射器具（最好就唔好吸毒！）。
• 千祈唔好共用個人護理用品包括剃鬚刀、牙刷、指甲剪等等。
• 針灸、穿耳同紋身嘅刺針或者器具必須消毒或者即用即棄。
• 如果你嘅性伴侶係乙肝帶菌者，請諮詢家庭醫生幫忙接種疫苗。

疫苗

建議所有人接種，而唔係淨係男同志。

治療

• 如果有肝炎症狀，就要搵家庭醫生評估。
• 慢性乙肝病人都有得醫。

演變

• 會引起急性肝炎同埋可以發展成慢性肝病，包括肝硬化同埋肝癌。
• 多達八成嘅急性患者清除唔到病毒，仲會演變成慢性帶病毒者。

症狀

• 大多數患者都無病徵。
• 可能有流感般嘅症狀：發燒、乏力、肌肉酸痛、頭痛、食慾不振和噁心等。如果病情較差，黃疸（皮膚同眼白發黃）就會出現。

感染途徑

• 大部份係經由共用針筒或者注射器具傳播。
• 小部份係經由性接觸傳播，好似肛交同埋拳交，尤其係愛滋病或性病感染者。

預防方法

• 記住搞嘢一定要安全（戴套呀！）。
• 唔好共用假陽具等性玩具。如果玩具畀血液沾污，應該用1：4稀釋家用漂白水消毒。
• 千祈唔好共用針筒，每次都要用即棄嘅針頭同注射器具（最好就唔好吸毒！）。
• 千祈唔好共用個人護理用品包括剃鬚刀、牙刷、指甲剪等等。
• 針灸、穿耳同紋身嘅刺針或者器具必須消毒或者即用即棄。

疫苗

目前無疫苗可以用！

治療

• 如果有肝炎症狀，就要搵家庭醫生評估。
• 藥物例如聚乙二醇化干擾素同利巴韋林都醫得到，但唔係每個人都成功。
• 最新研發嘅直接抗病毒藥物 (direct-acting antiviral agent) 已相繼應用於治療上。