你有無做過愛滋病測試呢？你無咁做可能有你嘅原因，而且做這個決定亦可能好難。然而，為咗照顧好自己嘅健康，你必須邁出重要嘅一步。下面係一些提示，令你儘快做明智嘅決定：
我信我嘅新伴侶
vs. 開始新關係之前，行出第一步
+
你同你嘅新伴侶都應接受愛滋病測試同了解測試結果，這並不代表你唔信對方，而係就算你只有一個性伴侶，都需要用呢個方法保護自己同你嘅伴侶。國外有研究顯示，四個傳播愛滋病病毒嘅男士當中，有一個係承認同對方有穩定關係，所以真係要了解真相先能掌握自己嘅健康。
我好fit，我乜病徵都無
vs. 你要做定期測試
+
大多數愛滋病病毒感染者都無任何病徵。就算你覺得自己感染嘅機會好低，都建議大食嘅男同志應該每3個月定期做愛滋病測試。
真係唔夠膽做測試同面對真相
vs. 測試咗咪可以安心囉
+
我們完全理解接受愛滋病測試係可以令人好緊張，但只有這樣做先對得起自己同你嘅至愛。做測試先至係真正令你放開嘅唯一途徑。
- 如果驗出來係陽性，你可以考慮儘早接受治療。越早診斷，就越大機會過正常健康嘅生活。另外，一旦開始治療，傳播愛滋病病毒嘅風險就會減低。
- 如果驗出來係陰性，你就大可以放心，繼續養成安全去玩嘅習慣。
- 受過訓練及富經驗嘅專人會喺測試前後為你提供輔導服務，就你嘅需要提供適當嘅情緒支援。
衞生署一直提供免費不記名嘅愛滋病輔導同測試服務，所有資料都保密處理。一些非政府組織同樣提供類似嘅服務。
愛滋病病毒抗體測試好快做完，只係需要20分鐘左右就知結果。快啲打我哋嘅熱線2117 1069，或者搵提供愛滋病相關服務嘅非政府組織幫手啦！
如果我positive就畀人通街唱
vs. 所有測試結果都係保密處理
+
所有測試服務都係保密、不記名。除非你選擇講畀人知，如果唔係係無人知道你嘅結果。
如果我中咗HIV，我就以後點玩都玩得唔開心
vs. 你仲可以有正常嘅性生活
+
感染咗HIV唔代表你唔可以有滿意嘅性關係，或者代表會自動將病毒傳染畀另一半；相反，有病毒只係代表扑嘢嘅時候需要用適當嘅措施保護你自己同你嘅伴侶。
