用套小貼士

點樣揀安全套

• 厚好定係薄好？

  入人嘅時候，安全套會受壓，可以用硬淨啲（即更厚）嘅套，但普通嘅套用得正確，加上大量潤滑劑，其實同樣有效。

• 大好定係細好？

  如果安全套太細，你可能會周身唔自在，套又會容易爛。如果安全套太大，又可能好易甩，所以一定要用啱你大細嘅安全套。安全套的尺碼通常以平放時底部的闊度表示，所以是圓周的一半。

  • 如果你需要用細啲嘅安全套，可以用「收緊型」、或者「貼身型」
  • 如果你需要用闊啲或者長啲嘅，可以用「大號」或者「加大號」
• 乳膠定係非乳膠好？

  大多數安全套都係用乳膠造，但係有啲人對乳膠敏感。如果係咁，可以買用聚氨酯造嘅安全套。

戴套前

• 放安全套嘅地方要避免陽光直射，同要遠離有熱力嘅地方。
• 用套前要檢查有效日期。
• 口交、肛交同共用性玩具嘅時候，都要用安全套。
• 安全套有唔同大細、形狀、質地、口味同顏色，揀番個啱你口味嘅套。入人嘅時候要用硬淨啲嘅安全套；口交嘅時候就可以試有唔同味道嘅套。
• 搽咗潤滑劑嘅安全套比無搽嘅無咁易整穿。油份、梘液或者凡士林等油性潤滑劑會好易整穿乳膠造嘅安全套，所以要用水溶性潤滑劑。
• 現時研究未能顯示，Nonoxynol-9 類殺精藥能減低性病及愛滋病嘅感染，相反，用咗反而會刺激皮膚同黏膜而做成破損，從而增加感染性病/愛滋病嘅機會。

戴套時

• 唔好同一時間戴多過一個安全套。
• 小心唔好整爛安全套，唔好用牙咬開安全套包裝。
• 小心指甲刮爛安全套。
• 揸住安全套嘅頂端擠出空氣，先至可以預留空間裝精液。
• 喺「細佬」變硬嘅時候先好戴套。
• 戴套後，將安全套嘅環邊順住「細佬」一直向下挘開，但唔好扯開安全套。
• 雖然大多數安全套已經有潤滑劑，但當潤滑程度唔夠時，一定要用更多潤滑劑，保證玩得更high。
• 如果安全套爛咗，請你即刻換一個新套。

完事後

• 爆漿後同喺「細佬」軟之前，首先要揸實安全套嘅底部，再拉出來。
• 唔好重覆使用同一個安全套，每次一定要用全新嘅安全套。